عبد الرحمن
«شو عم يوجعك أكتر شي؟»… «عيوني»

سألنا عبد الرحمن: «شو عم يوجعك أكتر شي يا روحي؟» قال: «عيوني».
وسألناه شو أول شغلة بدّك تشوفها إذا رجعلك نظرك؟ قال: «ماما وبابا… اشتقتلهم».
قصة عبد الرحمن
عبد الرحمن عمره 9 سنين، عنده نوع نادر من الأورام بالمخ. أول ما إجا الورم فقد بصره، وهلّق ما عم يشوف أبداً.
بيحكيلنا أبو عبد الرحمن إنهم قبل العلاج عملوا صور وتحاليل وتخطيط، وأخدوا عينة من الورم، واستأجروا جهاز مشان يشخّصوا الحالة. صرفوا شي 6 لـ 7 آلاف دولار، وأغلبهم دين. هلّق عبد الرحمن بمرحلة الكيماوي، وجرعات الكيماوي متكفلة فيها جمعية بسمة، الله يجزيها الخير.
بس العلاج ما بيوقف عند الجرعات. كل يوم في تكاليف جديدة: إبر مضاد حيوي، إبر ترجيع، إبر حرارة. ومرّة بيلزمه صفائح ومرّة دم. وكل فترة لازم يعيدوا الصور والتحاليل ليتأكدوا إنه الورم عم يخف.
أبو عبد الرحمن ما عم يشتغل هلّق، لأنه لازم يكون جنب ابنه أكتر شي. والحمد لله، أخو زوجته واقف معهم وما قصّر.
والأمل كبير: دكاترة العيون قالوا في استجابة لعيونه، وإذا تعالج من الورم ممكن يرجعله نظره، ويرجع لحياته الطبيعية، ويرجع على المدرسة.
ولما سألناه شو بدّك تصير لما تكبر؟ قال: «مهندس».
ماذا يحتاج عبد الرحمن
- إبر المضاد الحيوي والترجيع والحرارة اللي بياخدها بشكل يومي.
- الصفائح والدم وقت ما يحتاجهن.
- الصور والتحاليل الدورية ليتأكدوا إنه الورم عم يخف.
كيف يُصرف تبرعك
- تكاليف علاج عبد الرحمن اللي ما بتغطيها الجمعية.
- الصور والتحاليل خلال فترة العلاج.
اتفقنا مع عبد الرحمن إنه يكمّل علاجه، وما يبكي، وإنه رح يرجع يشوف ماما وبابا ويرجع على مدرسته. ووعدناه نرجعله بأقرب وقت ومعنا خبر حلو. كل 1$ رح يصنع فرق.

